كتاب جثه بملامح بني أدم

لسه فاكرها.. وفاضل مني حتة هناك في نفس الركن والمشهد وفي نفس المكان إياه كأن الوقت واقف بيا مش راضي كأني بعيش في حلم قديم وبحلم بالرجوع عادي. وحشتيني.. بأقولها لكل طوب الأرض إلا إنتِ بأقولها في سري مش قاصد في وقت ما تظهري فجأة على بالي وأحس إني وحيد جداً.. ورخيص غالي. وحشتيني.. وشوقي ليكي مش فكرة ده وجع بيبات معايا ليلاتي للمشهد بتاع بكرة بشوفك في الوجوه كلها، في المترو، وفي الشارع وفي الصوت اللي يشبهلك في راديو قديم بقاله سنين ومش سامع بشوفك في الكلام اللي ما قولناهوش وفي الحلم اللي عِشنا فيه وما طالناهوش. أنا مش زعلان عشان غبتي.. أنا زعلان عشان غيبتي ومعاكي ملامح عُمر وعلشان الشوارع بعد منك طعمها بقى مُر وعلشان السرير بارد، وكوباية الشاي ناقصة وعلشان الحكايات بعدك بقت باهتة وبقت قاسية. مفيش بعدك طريق يسلك ولا فيه حد يشبهلك ولا فيه حِضن يعرف يطرد البرد اللي جوايا أنا المكسور من العِشرة.. وأنا الجاني في حكايتنا وأنا الضحية والـجَوّاية. سامحيني.. إذا لمحتيني في يوم بضحك مع الأيام ده ضحك في مأتمك يا حبيبتي.. تمثيل وكلام أنا من بعد ما سيبنا بعض، مابعيشش أنا بس بـكمّل شكل بني آدم.. لكن جواه مفيش. أنا هنا.. لسه واقف في مكاني بدبل زي شجرة في خريف ملوش آخر وبحاول أعيش.. وبقاوح وبكابر
عبد الوهاب زعزوع - كاتب وشاعر مهتم بالأدب الواقعي والاجتماعي، أمتلك خبرة في العمل الإداري الحكومي إلى جانب مسيرة أدبية حافلة بكتابة الشعر الفصيح والعامي المصري. مؤسس منصة ‵قلم وميكروفون‵ لصناعة المحتوى الأدبي، ومؤلف ديوان ‵رحلة إلى العشرينيات‵. أجمع بين الانضباط المهني والقدرة على التعبير الإبداعي وتطوير المحتوى الرقمي.الإنجازات الأدبية والمشاريع:ديوان ‵رحلة إلى العشرينيات‵: مجموعة شعرية توثق تجارب جيل الشباب، تجمع بين الفلسفة والواقعية الاجتماعية.مبادرة ‵حارس الأمل‵: تأليف قصيدة مهداة لمعهد الأورام بدمنهور، لتقديم الدعم المعنوي للمرضى والعاملين.
من ديوان شعري كتب الأدب - مكتبة كتب الأدب.